O Consello de Goberno da Universidade da Coruña aprobou o 10 de decembro de 2008 a memoria do Plan de estudos de graduado ou graduada en Enxeñaría da Edificación.
O Consello Xeral de Colexios Oficiais de Enxeñeiros Industriais interpuxo recurso contencioso-administrativo contra a Resolución do 17 de decembro de 2007, da Secretaría de Estado de Universidades e Investigación, pola que se publica o Acordo do Consello de Ministros do 14 de decembro de 2007 polo que se establecen as condicións a que deberán adecuarse os plans de estudos conducentes á obtención de títulos que habiliten para o exercicio da profesión regulada de arquitecto técnico (Boletín Oficial del Estado do 21 de decembro de 2007) e contra a Orde ECI/3855/2007, do 27 de decembro, pola que se establecen os requisitos para a verificación dos títulos universitarios oficiais que habiliten para o exercicio da profesión de arquitecto técnico (Boletín Oficial del Estado do 29 de decembro de 2007). A Sentenza do Tribunal Supremo (Sala do Contencioso-Administrativo, Sección 4) do 9 de marzo de 2010 estimou o citado recurso e decidiu a anulación nas ditas disposicións das epígrafes correspondentes en que se inclúe a denominación de graduado ou graduada en Enxeñaría da Edificación.
Para dar cumprimento a estas sentenzas do Tribunal Supremo, a Universidade da Coruña aprobou o cambio de denominación do título de graduado ou graduada en Enxeñaría da Edificación polo de graduado ou graduada en Arquitectura Técnica por resolución do seu Consello de Goberno de data do 21 de marzo de 2013, que obtivo informe favorable da Axencia para a Calidade do Sistema Universitario de Galicia con data do 25 de novembro de 2013 para a nova denominación e a súa inclusión no RUCT.
